Во целост ги пренесуваме ставовите и очекувањата на Дејан Мирчевски- Осигурителен Брокер
Осигурување магазин:Што е тоа што Ве натера да го одберете осигурителниот сектор како професија? Од каде почнавте и како изгледаше вашата кариерна патека?
Дејан М: Изборот да започнам во осигурителниот сектор ми дојде сосема случајно.Во тој период, почнав да работам со цел да заработам нешто дополнително, бидеќи домашната финансиска ситуација не беше баш сјајна. Бидејќи бев студент (2 година на Електротехничкиот факултет во Скопје), најпрво почнав со хонорарен ангажман со продажба во компанијата каде што работам и ден денес- веќе 13 години. Ја одбрав токму оваа компанија бидејќи беше единствената што имаше одлична менторска програма, со уникатен начин на поттикнување и развој на претприемнички настроени индивидуи.
На почетокот, кариерата ми се движеше релативно споро, бидејќи имав доста работи и вештини што требаше да ги совладам како: водење на продажни разговори, преговарање, заклучување на договори, итн. Дополнително, требаше да ја научам и суштината на осигурувањето и на финансиите. Со положување на испит за осигурителен брокер во 2015 година официјално започна и мојата професионална кариера во овој сектор.
Благодарение на врвниот едукативен систем што го имаме во групацијата, успеав од студент кој што немал ниту допирна точка со продажба, ниту со осигурување, да стигнам до ниво каде што имам феноменален обем на продажба на месечно ниво.
Осигурување магазин:Трендот на пазарот на труд е менување на работното место. Дали е тоа случај во осигурителниот сектор и дали е тешко да се задржат младите и да работат во осигурителната дејност?
Дејан М: Овој тренд на промена на работно место е релативно послаб во осигурителниот сектор, но сепак постои. Осигурителниот сектор долго време важеше за неатрактивен сектор, особено за младите. Иако во
последните неколку години гледам како полека заживува нивниот интерес кон оваа област, сепак сѐ уште постои простор за приближување на врвните кариерни можности што ги нуди овој сектор до новите генерации.
Сметам дека таа неатрактивност е комбинација од одредени погрешни чекори што осигурителните компании ги направиле во минатото, спорото прилагодување кон промените и дигитализацијата, како и драстичното отскокнување на други сектори генерално во светот. Во последно време, се повеќе се соочуваме со нетрпение од младите што трагаат по брза кариера и заработка преку ноќ. Ова непотребно се наметна како “новото нормално” од страна на одредени сектори што станаа тренд и даваат нереална слика за кариерниот напредок.
Генерално, осигурителниот сектор се дели на продажба и администрација.Сметам дека сите млади треба првично да се пробаат во делот на продажба. На овој начин, преку директна комуникација со клиентите, ќе имаат можност да ги слушнат нивните потреби и дилеми, а потоа да одлучат дали сакаат да останат во продажба или можеби да се насочат во back-office секторот, секако со искуството што го добиле од терен да продолжат во развој на компанијата и кариерата.
Осигурување магазин:Дејан според тебе што е потребно за еден успешен тим?
Дејан М: Водење на успешен тим е како одржување на здраво тело. Сите членови од тимот се меѓусебно поврзани на некој начин. Од исклучително значење за водење на успешен тим е да се има квалитетен лидер што ќе го води тимот кон заедничката цел.Неговата задача е да ги синхронизира сите членови во тимот, да им помогне да си ги реализираат своите амбиции, да си го отклучат својот потенцијал, а со тоа резултатите на тимот во целина да бидат за восхит. Дополнително тоа што е повеќе од потребно, е постојано надоградување, едукација и доусовршување за да бидат сите спремни за предизвиците што ќе се појават.
Осигурување магазин:Во продажбата во осигурувањето како и во секоја продажба постојат таргети, кој е клучот за еден вработен да го исполни својот таргет во осигурувањето?
Дејан М: Таргетите се ставени од страна на менаџментите на компаниите како насока за движење, не како крајна цел. Секој што работи во продажба во осигурување, треба да знае дека таргетите се за нас, а клиентите не се одговорни за нашите резултати. За да се исполни таргет, примарно треба да се стави интересот на клиентите на пиедестал.
Не го кажувам ова како клише одговор, бидејќи осигурувањето првично се заснова на доверба. На кого ќе ја довериш заштедата за твоето дете,заштитата на имотот на клиентите, возилата, бизнисот, финансиската
ситуација на семејството, итн. Кога интересот на клиентите ќе се стави пред таргетот, тогаш целата работа во продажбата добива смисла. Тоа некогаш значи дека на клиентите ќе треба да им кажеме дека не треба да направат одреден договор, или да го направат кај конкуренцијата, затоа што таму би им дале подобри услови за она што го бараат. На краток рок, ова можеби делува како пораз, но на долг рок носи лојални клиенти и трократно исполнети таргети.
Осигурување магазин:Што мислиш за конкуренцијата на македонскиот пазарот, колку е тешко да се обноват полисите како и тоа да се склучат нови полиси?
Дејан М: Во изминативе години, конкуренцијата добива своја здрава форма.Односно, ретко постои конкуренција што оди против свој интерес, само колку да се добие клиентот/бизнисот.
Од почетокот на Ковид-19 пандемијата, свеста за потребата од осигурувањето кај клиентите се подигна на доста повисоко ниво. Голем број од луѓето веќе имаат и одредено предзнаење кога разговараме со нив. Тоа ни служи како потврда дека сме тргнати на добар пат, но сепак сме далеку од потенцијалот.
Дали клиентите ќе обноват одредена полиса, е последица на тоа дали ние сме им одбрале најдобра понуда уште на почетокот, дали сме биле покрај нив при евентуална штета и дали повторно сме на нивна страна при обновата. Доколку во некој дел потфрлиме, секако дека нема да се обнови полисата, или нема да се обнови кај нас.
А во делот за склучување на нови полиси, можам одговорно да потврдам дека како никогаш порано, луѓето денес се навистина отворени за да разговараат за своите потреби од одредено осигурување. Веќе сѐ повеќе се слушаат позитивни примери од задоволни клиенти и исплатени штети.
Секако, овде голема улога имаше и контролата на пазарот спроведена од АСО, регулаторот на осигурителниот сектор.
Осигурување магазин:Што би им препорачале на оние нови таленти кој сега влегуваат во
продажбата на осигурувањето?
Дејан М: Ако некој да ме врати повторно на почетокот на кариерата пред 13 години,би го одбрал истиот сектор, истиот кариерен пат, истата фирма, истиот ментор.
Моја препорака до младите е уште од старт да стават фокус на едукација наспроти заработка. Да најдат квалитетен ментор кој што е спремен безусловно да го сподели своето знаење и без двоумење да ги следатнеговите насоки.
Во осигурителниот сектор има навистина солидни заработки единствено за тие што ја разбираат тематиката, ги разбираат клиентите и им ги решаваат предизвиците, согласно нивните барања.
Oсигурување магазин:Дејан за крај,што мислите за нашиот портал, за нашата идеjа да ја подигнеме свеста за осигурувањето во Македонија?
Дејан М: Сметам дека Вашиот портал е одлична платформа, место за објективно да се претстават можностите и опциите со цел осигурениците сами си донесат своја одлука. Можам да потврдам дека вакви портали навистина многу недостигале во минатото, бидејќи јас лично сум барал место каде да ги
прочитам новостите во мојот сектор. Благодарен сум што секојдневно се вложувате да ја кренете свеста за важноста од осигурувањето и носите вистинска вредност во општеството!
Доколку преземете содржина (статија или оглас) од ОСИГУРУВАЊЕМАГАЗИН задолжително наведете „Извор: ОСИГУРУВАЊЕМАГАЗИН“ на крајот на статијата со hyperlink кој ќе води од преземената содржина. Преземањето на интервјуа не е дозволено. Повеќе за условите за користење е наведено